Wednesday 4 July 2012

ഗൌരി


കരയാത്ത ഗൌരി തളരാത്ത ഗൌരി
കലികൊണ്ടു നിന്നാല്‍ അവള്‍ ഭദ്രകാളി
ഇതുകേട്ട് കൊണ്ടേ ചെറു ബാല്യമെല്ലാം
പതിവായി ഞങ്ങള്‍ ഭയമാക്കി വന്നു
നെറികെട്ട ലോകം കനിവറ്റ കാലം
പടകാളിയമ്മേ കരയിച്ചു നിന്നെ
ഫലിതത്തിനെന്നും തിരുമേനി നല്ലൂര്‍
കലഹത്തിനെന്നും അടിയാത്തി പോരും
ഗുരുവാക്യമെല്ലാം ലഘ്യവാക്യമായി
ഗുരുവിന്റെ ദുഃഖം ധ്വനി കാവ്യമായി
അതുകേട്ട് നമ്മള്‍ ചരിതാര്‍ത്ഥ്യരായി
അതുവിറ്റു പലരും പണമേറെ നേടി
അതിബുദ്ധിമാന്മാര്‍ അധികാരമേറി
തൊഴിലാളി വര്‍ഗ്ഗം അധികാരമേറ്റാല്‍
അവരായി പിന്നെ അധികാരി വര്‍ഗ്ഗം
അധികാരമപ്പോള്‍ തൊഴിലായി മാറും
അതിനുള്ള കൂലി അധികാരി വാങ്ങും
വിജയിയ്ക്കു പിന്‍പെ കൊതികൊള്ളു ലോകം
വിജയിയ്ക്കു മുന്നില്‍ വിരിയുന്നു കാലം
മനുജന്നു മീതെ മുതലെന്ന സത്യം
മുതലിന്നു മീതെ അധികാര ശക്തി
അധികാരമേറാന്‍ തൊഴിലാളി മാര്‍ഗ്ഗം
തൊഴിലാളിയെന്നും തൊഴിലാളി മാത്രം
അറിയേണ്ട ബുദ്ധി അറിയാതെ പോയാല്‍
ഇനി ഗൌരിയമ്മേ കരയാതെ വയ്യ
കരയുന്ന ഗൌരി തളരുന്ന ഗൌരി
കലിവിട്ടൊഴിഞ്ഞാല്‍ പടു വൃദ്ധയായി
മതി ഗൌരിയമ്മേ കൊടി താഴെ വെയ്ക്കാം
ഒരു പട്ടുടുക്കാം മുടികെട്ടഴിയ്ക്കാം ഉടവാളെടുക്കാം
കൊടുങ്ങല്ലൂര്‍ ചെന്നാല്‍ ഒരു കാവു തീണ്ടാം
ഇനി ഗൌരിയമ്മ ചിതയായി മാറും
ചിതയാളിടുമ്പോള്‍ ഇരുളൊട്ടു നീങ്ങും
ചിതകെട്ടടങ്ങും കനല്‍ മാത്രമാകും
കനലാറിടുമ്പോള്‍ ചുടു ചാമ്പലാകും
ചെറുപുല്‍കൊടിയ്ക്കും വളമായി മാറും
കരയാത്ത ഗൌരി തളരാത്ത ഗൌരി
കലികൊണ്ടു നിന്നാല്‍ അവള്‍ ഭദ്രകാളി



കവിത: ഗൌരി
രചന: ചുള്ളിക്കാട്
ആലാപനം: ചുള്ളിക്കാട്

6 comments:

  1. “തൊഴിലാളി വര്‍ഗ്ഗം അധികാരമേറ്റാല്‍
    അവരായി പിന്നെ അധികാരി വര്‍ഗ്ഗം
    അധികാരമപ്പോള്‍ തൊഴിലായി മാറും
    അതിനുള്ള കൂലി അധികാരി വാങ്ങും”

    ശുഭദിനാശംസകള്‍!

    ReplyDelete
  2. Thank You
    Jacob

    ReplyDelete
  3. എത്ര ശരിയായി പറഞ്ഞു ചുള്ളിക്കാട്. താങ്ക്സ് ഫോര്‍ ഷെയറിംഗ്

    ReplyDelete
  4. ഗൌരിയമ്മ പല്ല് കൊഴിഞ്ഞ സിംഹി!

    ReplyDelete
  5. ഏവര്‍ക്കും കവിത ഇഷ്ടമായെന്നറിഞ്ഞതില്‍ സന്തോഷം!
    ശുഭദിനാശംസകള്‍!

    ReplyDelete
  6. സത്യമാണ്...

    ReplyDelete